Chand nikla nahi_n to kiya gham hai

 uski yaado_n ka chaandna to hai

Jee bhar ke dekh leta hoo_n mai_n aayena-badan aata hai

yaad jab bhi sitamgar khayaal mei_n

Yaado_n kee zaafraan hai Kashmir kee tarah jab se

hamari zeest mei_n daakhil huye hai_n aap

Aankhon mein uski yaad kee tasweer-e-gham na ho,

aisa hua nahi_n, kabhi aisa hua nahi_n.

Waqt barbaad karne waala tha,

Mai_n tujhe yaad karne waala tha.

Kisi-ki yaad bhi kitne hujoom rakhti hai, 

Akela rah-ke mai_n saare zamaane waala hoo_n.

Yaad rakhna tujhey mera ek jurm tha,

Bhool jana tujhey doosra jurm hai,

Ya sitam hai ke terey hasii shehar mei_n,

her taraf ghaur say dekhna jurm hai.

Guzar chuki thi bahut rat bato_n bato_n mei_n,

Phir uTh ke woh tera shamma bujhana yaad aata hai,

Ghataye kitni dekhi hai_n par mujhe Asrar,

Kisi ka ruKh par woh zulfe’n girna yaad aata hai.

Humei_n to ab bhi wo guzra zamana yaad aata hai,

tumhei_n bhi kya kabhi koi diwana yaad aata hai,

hawaye tez thi barish bhi thi tufaa_n bhi tha lekin,

tera aise mei_n bhi wada nibhana yaad aata hai.

Ishq ki chandni ratei_n mujhe yaad aati hai_n,

Umar-e-rafta ko meri mujh se mila de akar,

Zauq-e-nadid mei_n lazzat to hai magar naz nahi,

Aa mere ishq ko maghroor bana de akar.

Jab meri yad sataye tu mujhe Khat likhna,

Tum ko jab neend na aye tu mujhe Khat likhna.

Woh jo hum mei_n tum mei_n qaraar tha tumhe_n yaad

ho ke na yaad ho,

Wohi waada yaani nibah ka, tumhe_n yaad ho ke na yaad

ho.

Yaad thei_n humko bhi ranga rang bazm aaraaeaa_n,

Lekin ab naqsh-o-nigaar-e-taaq-e-nisiaa_n ho gayei_n.

Yaad uski itni khoob nahi_n, Mir, baaz aa,

Naadaan phir woh jise bhulaya na jaaega.

Nahi_n aati tau yaad unki maheeno_n bhar nahi_n aati,

Magar jab yaad aate hai_n tau aksar yaad aate hei_n.

Kabhi hum mei_n tum mei_n bhi chah thi,

kabhi hum mei_n tum mei_n bhi raah thi,

Kabhi hum bhi tum bhi the aashna,

tumhe_n yaad ho ke na yaad ho.

Dekh aae aaj yaado_n ka nagar,

Har taraf parchhaaeaa_n, parchhaaeaa_n,

Hum ahl-e-qafas tanha bhi nahi_n, har roz naseem-e-

subah-e-watan,

Yaado_n se muattar aati hai, ashko_n se munawwar jaati

hai.

Mu_nh dekhe ki baate_n hai_n sab,

Kis ne kis ko yaad kiya hai.

Yaad-e-maazi azaab hai, yaarab,

Chheen lo mujh se haafiza mera.

Duniya ke sitam yaad, na apni hi wafa yaad,

Ab mujh ko nahi_n kuchh bhi mohabbat ke siwa yaad.

Kya lutaf ke mai_n apna pata aap bataoo_n,

Ki jeye koi bhooli hui khas apni ada yaad.

Yoo’n kis tarah katega kari dhoop ka safar,

Sar par khayaal-e-yaar ki chaadar hi le chale_n.

Go mai_n raha raheen-e-sitam haae rozgaar,

Lekin tere khayaal se ghaafil nahi_n raha.

Saqi bhala kaha_n qismat mei_n ab woh chhalakte paimaane,

Hum yaado_n ke jaam choom ke sookhe hont bhigo le hai_n.

Yaad-e-ghazaal chashmaa_n, zikr-e-sama_n-azaaraa_n,

Jab chaaha karya hai kunj-e-qafas baharaa_n.

Garz ke kaat dieye zindagi ke din, ai dost,

Woh tiri yaad mei_n ho_n, ya tumhe_n bhulane mei_n.

Zindagi yoo_n bhi guzar hi jaati,

Kyo_n tera rahguzar yaad aaya.

Guzaari thei_n khushi ki chand gharia_n,

Unhi ki yaad apni zindagi hai.

Chooria_n bajti hai_n dil mei_n, marhabaa! bazm-e-

khyaal,

Khilte jaate hai_n nigaaho_n mei_n jabeeno_n ke gulab.

Jaane waale kabhi nahi aate,

Jaane waalo_n ki yaad aati hai.

Ujaale apni yaado_n ke hamaare paas rahne do,

Najaane kis gali mei_n zindagi ki shaam ho jaae.

Tumhaari yaad ke jab zakhm bhar ne lagte hai_n,

Kisi bahaane tumhe_n yaad kar ne lagte hai_n.