donateplease
newsletter
newsletter
rishta online logo
rosemine
Bazme Adab
Google   Site  
Bookmark and Share 
mazameen
Share on Facebook
 
Literary Articles -->> Adbi Gosha
 
Share to Aalmi Urdu Ghar
Author : Akhtar Sardar Chaudhary
Title :
   Lafz Mere, Mere Hone Ki Gawahi Denge


لفظ میرے ،میرے ہونے کی گواہی دیں گے


 اختر سردار چودھری

 

پر وین شاکر پیر کی رات رم جھم برستی بارش میں صبح اذان کے وقت 24نومبر1954 کو روشنیوں کے شہر کراچی کے ایک ہسپتال میں پیدا ہوئی ۔جس گھرانے میں آنکھ کھولی وہ گھرانہ علم و ادب کے ساتھ وابستہ تھا۔ اس کے خاندان میں کئی شعرا ء اور ادبا ء پیدا ہوئے اس لیے بچپن سے ہی اسے علم دوست ماحول میسر آیا اور وہ بہت سے شعرا ء اور ادبا ء سے واقف ہوئی ، ان کے والد سید ثاقب حسین خود بھی ایک شاعر تھے اور وہ شاکر تخلص کرتے تھے والد محترم کا تخلص ہی پروین نے اپنے لیے منتخب کیا اور پروین شاکر کہلائیں آپ کی والدہ کا نام افضل النساء تھا ۔عام طور پر کہا جاتا ہے کہ والد کے مشن اس کی نیک اولاد پورا کرتی ہے تو پروین شاکر نے اپنے والد کا نام روشن کر کے اس بات کو ثابت کر دیا (اس تحریر کو لکھنے کے لیے میں نے پروین شاکر کے والد کی شاعری تلاش کرنے کی کوشش کی مگر مجھے دستیاب نہ ہوسکی اگر ان کی کوئی غزل مل جاتی تو اس بات کا علم ہو جاتا کہ وہ کیسی شاعری کیا کرتے تھے ) آپ کے والد ہجرت کر کے پاکستان آئے تھے اور انہوں نے رہائش کے لیے کراچی کو پسند کیا پروین شاکر کا اسلاف ہندوستان کے صوبہ بہار کے ایک گاوءں چندی پٹی سے تعلق رکھتا تھا ۔پروین شاکر اور اس کی بڑی بہن نسرین بانو نے بچپن ایک ساتھ گزارا اس کی بہن اس سے دو کلاس آگے تھی جب پروین تیسری کلاس میں ہوئیں تو ان کو ڈبل پرموشن دیا گیا۔ جس سے وہ اپنی بڑی بہن کی ہم کلاس ہو گئیں ۔ میٹرک رضیہ گرلز ہائی سکول سے پاس کیا ۔اس کے بعد سرسید گرلز کالج کراچی سے بی اے ،انگلش لٹریچر کے ساتھ بی اے آنر کیا۔کراچی یونیورسٹی سے ایم اے انگلش اعلٰی نمبروں سے پاس کیا ،پھر لسانیات میں ایم اے کی ڈگری لی ۔پی ایچ ڈی کی ڈگری (جنگ میں ذرائع ابلاغ کا کردار ) پر مقالہ لکھ کر حاصل کی لیکن تعلیم کا سلسلہ یہیں تک محدود نہیں ہے بلکہ پروین شاکرساری دنیا کے علوم جلد از جلد حاصل کرنے کی دھن میں تھی شائد اسے علم تھا کہ اسکی زندگی مختصر ہے اور اسے ابھی بہت کام کرنے ہیں ۔اس کے بعد آپ ہارورڈ یونیورسٹی سے منسلک ہو گئیں اور بینک ایڈمنسٹریشن میں ایم اے کر لیا ۔اس کے بعد عبد اللہ گرلز کالج میں نو سال انگلش لیکچرار کی حیثیت سے ملازمت کرنے کے بعد سی ایس پی کا امتحان دیا ۔پاس ہونے پر محکمہ کسٹمر میں کلکٹر بن گئیں جہاں ترقی پا کر پرسنل سیکریٹری اور بعد ازاں سی ۔آر ۔بی ۔آر اسلام آباد مقرر ہوئیں ۔پروین شاکر ایک نرم دل ،سخی ،محنتی،بے چین طبعیت Parveen Shakirکی مالک تھیں ۔ان کے بارے میں یہ کہا جا سکتا ہے کہ وہ بے حد حساس خاتون تھی ۔اسی حساس طبعیت نے ہی اسے شاعری کی طرف راغب کیا ہو گا ،حساس طبع افراد کے جو ارد گرد ہو رہا ہوتا ہے اس سے بہت متاثر ہوتے ہیں کچھ اس کا اظہار کرنے پر قادر ہوتے ہیں اور کچھ نہیں کر سکتے ہم دیکھتے ہیں کہ بہت سے افراد ان پڑھ ہونے کے باوجود اپنی کیفیات بیان کرنے کی صلاحیت رکھتے ہیں مگر پروین شاکر کے ساتھ ایک اور مسئلہ بھی تھا کہ وہ صنف نازک سے تعلق رکھتی تھیں ،اور ہمارے معاشرے میں ابھی تک عورتوں کو وہ مقام نہیں ملا کہ وہ اپنی کیفیات بیان کر سکیں ویسے مرد جتنا مرضی روشن خیالی کے دعوے کرتے پھریں ہمارے معاشرے میں عورت کو گھٹن کا شکار کر کے مار دیا جاتا ہے اور جو معاشرے کی اس رسم کے خلاف بغاوت کرے اس کو طعنے دے دے کر اس کی زندگی اجیرن کر دیتے ہیں کہنا یہ ہے کہ ہمارے معاشرے میں عورت کو اس کا جائز مقام نہیں ملا اس کو اس کی شناخت نہیں ملی پروین شاکر ایک ذہین اور خوبصورت صاحب علم ہستی تھیں اسے خود کو منوانے کے لیے جتنی جہدو جہد کرنی پڑی ہو گی اس کا تصور کیا جا سکتا ہے یہی وجہ ہے کہ ان کی شاعری میں عورتوں کے جذبات کو بیان کیا گیا ہے ۔عورت تھیں عورتوں کے جذبات پر ہی لکھنا تھا لیکن ہمارے معاشرے میں ہمارے شعرا ء نے اسے وہ مقام نہیں دیا جس کی وہ مستحق تھیں کہا جاتا ہے کہ پروین شاکر نسائی تحریک سے وابستہ تھیں یا ان کی شاعری نسائی شاعری تھیں اس نے عورتوں کے جذبات و احساسات پر لکھا اس سے پہلے اردو شاعری میں ایسے کھل کر نہیں لکھا کسی اور شاعرہ نے اس طرح کی باتیں کر کے اس کے مقام کو آج بھی کم تر ثابت کیا جاتا ہے ایسا تبصرہ کرنے والوں کو سوچنا چاہیے کہ ان کی شاعری لب و رخسار سے آگے نہیں بڑھتی اور وہ اپنے دیوان کے دیوان کسی عورت کی محبت میں لکھتے ہیں اس کی تعریف میں لکھتے ہیں بلکہ دیوان کے دیوان تو عورت کی بے وفائی پر لکھے گئے ہیں بلکہ اکثر ایک مرد کو شاعر ہی عورت کی بے وفائی بناتی ہے ۔ اس لیے کہ وہ مرد ہیں تب درست ہے لیکن جب ایک عورت مرد کی طرف سے ملنے والی بے وفائی ،وفا ،محبت ،یا نفرت پر شاعری کرے تو یہ نسائی شاعری ہوگی یہ غلط بات ہے یہ تو مردانہ شاعری ہوئی نسائی شاعری تو ایسے شعرا ء حضرات نے کی بلکہ کرتے ہیں جن میں صرف نساء کا ذکر ہوتا ہے ۔ایسے ماحول میں جہاں عورت کو انسان ہی نہ سمجھا جائے ایک عورت کا خود کو قلم کار منوا لینا اور وہ بھی شاعری میں ایک بہت بڑا کارنامہ ہے جس کی جتنی بھی تعریف کی جائے کم ہے ۔پروین شاکر کا شما ر ان چند ایک خواتین میں میں ہوتا ہے جنہوں نے خود کو منوایا ہے اور ایسا منوایا ہے کہ اس کی اہمیت سے اب کسی کو انکار نہیں ہوسکتا ہے ۔اس سے پہلے اتنے جاندار طریقے سے کسی خاتون نے نسائی جذبات ،مسائل اور حقوق کواتنے اچھے طریقے سے شائد ہی بیان کیا ہو ۔


پروین شاکر کی شاعری میں انہی بنیادی حقوق کے حصول کے لیے ایک توانا آواز اٹھائی گئی ہے ۔جیسے ہی پروین شاکر کا نام لیا جائے تو خوشبو کا احساس ہونے لگتا ہے پروین شاکر کاپہلا مجموعہ خوشبو جب شائع ہوا اس وقت پروین شاکر کی عمر صرف 24 برس تھی ۔

ؔ ؔ عکس خوشبو ہوں بکھرنے سے نہ روکے کوئی.. اور بکھر جاوءں تو مجھ کو نہ سمیٹے کوئی
پروین شاکر کی شادی 1976 میں ڈاکٹر نصیر علی سے ہوئی جو رشتے میں ان کا خالہ زاد تھا اور ملٹری میں ڈاکٹر تھا 1978 میں اللہ نے ان کو ایک خوبصور ت بچہ سے نوازا جس کا نام مراد علی رکھا گیا ۔ پر وین نے بہت سی شاعری اپنے بیٹے کے لیے بھی کی ہے ۔ وہ اپنے بیٹے سے بہت محبت کرتی تھیں ۔

ؔ مجھے تیری محبت نے عجب ایک روشنی بخشی …..میں اس دنیا کو اب پہلے سے بہتر دیکھ سکتی ہوں

اس کے بارے میں مین بہت فکر مند رہتی تھیں اس نے بیٹے کو باپ بن کر پالا اسے کھبی باپ کی کمی کا احساس نہ ہونے دیا حالانکہ پروین شاکر کی زندگی بہت مصروف تھی۔ مشاعروں میں حاضری ،ان کی میزبانی ،آفسر بھی تھیں ،کالم بھی لکھے ،ان سب کاموں کے باوجود اپنے بیٹے کو تنہائی کا احساس نہ ہونے دیا جب کہ اس کا باپ بھی اس سے الگ ہو گیا تھا ۔ کیونکہ اس کی شادی زیادہ عرصہ تک قائم نہ رہ سکی اس کی بہت سی وجوہات میں سے ایک وجہ ان کے درمیان ذہنی ہم آہنگی کا نہ ہونا بھی ہے 1987 میں ان کی اپنے شوہر سے علیحدگی ہو گئی

ؔ کیسے کہہ دوں کہ مجھے چھوڑ دیا ہے اس نے ۔۔۔۔بات تو سچ ہے مگر بات ہے رسوائی کی ۔
ؔ کوئی سوال کرے تو کیا کہوں اس سے ۔۔۔۔۔بچھڑنے والے سبب تو بتا جدائی کا ۔

پروین کو شعرو شاعری کا شوق شروع سے ہی تھا کالج میں ہی وہ شعر کہنے لگی تھی پروین شاکر کی شاعری کی تعریف اس دور کے مشہور شعرا ء نے کی ہے مثلا احمد ندیم قاسمی ،فراز احمد فراز ، علی سردار جعفری وغیرہ اس کے علاوہ پروین شاکر کو پانچ بڑے ادبی انعامات و اعزازات سے بھی نوازا گیا جن کی مختصر تفصیل یہ ہے کہ آدم جی ایوارڈ جو پاکستان میں ایک قومی سطح کا اعزاز ہے 1978 کو خوشبو کے لیے دیا گیا ۔1985 میں علامہ اقبال ایوارڈ ۔1986 میں یو ایس آئی ایس ایوارڈ ،فیض احمد فیض ایوارڈ پروین شاکر نے حاصل کیا ۔اس کے علاوہ پروین شاکر کو حکومت کی جانب سے تغمہ حسن کارکردگی بھی ملا ۔پروین نے اتنی کم عمری میں وہ شہرت پائی جو بہت کم ادبا یا شعرا کو نصیب ہوتی ہے. ان کی ایک عادت بڑی عجیب تھی یہ کوئی خامی نہیں ہے بہت سے قارئین اس بات سے شائد واقف نہ ہوں کہ پروین شاکر عام طور پر کسی محفل میں ہوتیں،گھرمیں ہوتیں تو اپنے پاوءں سے جوتے اتار دیا کرتیں تھیں عام طور پر گاڑی بھی ننگے پاؤں چلایا کرتیں ،ان کی اس عادت کی نفسیاتی وجہ کیا تھی اس پر غور ہونا چاہیے اس طرح ان کی زندگی کی کتاب میں ایک اور باب کا اضافہ ہو جائے گا ۔پروین شاکر کی شاعری چند مخصوص الفاظ کو امر کر گئی ،اس نے ان خوبصورت الفاظ کو اپنی شاعری میں خوب استعمال کیا بلکہ پروین شاکر کو ،چاند ،خواب ،موسم ،پھول ،،خوشبو، رات کی شاعرہ کہنا چاہیے ۔پروین شاکر کے پہلے شعری مجموعہ خوشبو کو بے پناہ مقبولیت ملی بلکہ پروین شاکر کا نام لیں تو خوشبو آنے لگتی ہے یہ ان کا نام ہی بن گیا ہے ۔وہ خوشبو کی شاعرہ کہلانے کی مستحق ہے اس کے علاوہ اس کے شعری مجموعے میں سے 1980 میں صد برگ ، 1990 میں خود کلامی ، 1990میں ہی انکار اور 1994 میں ماہ تمام شائع ہوئے جیسے جیسے وقت گزرا ان کی شاعری میں پختگی آتی گئی لیکن جو مقبولیت خوشبو کو ملی اتنی مقبولیت اس کے دیگر کسی شعری مجموعے کو نہیں مل حالانکہ اس کے دیگر مجموعے کئی ایک لحاظ سے بہترین ہیں ان میں الفاظ کا چناؤ بہت عمدہ ہے اسی طرح خیالات میں بھی وسعت ہے ۔

پر وین شاکر پیر کے دن 26 دسمبر 1994 کو اسلام آباد میں اپنے آفس جاتے ہوئے راستے میں ان کی گاڑی کا ایکسیڈنٹ ہوا جس کی وجہ سے 42 سال کی عمر میں خالق حقیقی سے جا ملیں ۔ انہیں اسلام آباد کے قبرستان میں دفن کیا گیا ان کے کتبے پر یہ شعر درج ہے

۔مر بھی جاؤں تو کہاں ،لوگ بھلا ہی دیں گے ۔۔۔ لفظ میرے ، میرے ہونے کی گواہی دیں گے !
پروین شاکر کی شاعری سے چند اشعار قارئین کی نظر

میں سچ کہوں گی مگر پھر بھی ہار جاوءں گی۔۔۔ وہ جھوٹ بولے گا اور لاجواب کر دے گا شہر وفا میں دھوپ کا ساتھی نہیں کوئی ۔۔۔سورج سروں پر آیا تو سائے بھی گھٹ گئے
اس نے جلتی ہوئی پیشانی پہ جب ہاتھ رکھا ۔۔۔۔۔۔روح تک آگئی تاثیر مسیحائی کی
اس شرط پہ کھیلوں گی پیا پیار کی بازی ۔۔۔ جیتوں تو تجھے پاؤں ہاروں تو پیا تیری !

۸۸۸۸۸۸۸۸۸۸۸۸۸۸۸۸

 

Comments


Login

You are Visitor Number : 925