donateplease
newsletter
newsletter
rishta online logo
rosemine
Bazme Adab
Google   Site  
Bookmark and Share 
mazameen
Share on Facebook
 
Present Situation -->> Hindustan
 
Share to Aalmi Urdu Ghar
Author : Arif Aziz, Bhopal
Title :
   Musalmano Ki Elahda Shenakht,Qaumi Ittehad Ke Liye Kabhi Masla Nahi Bani

مسلمانوں کی علاحدہ شناخت ، قومی اتحاد کیلئے کبھی مسئلہ نہیں بنی


عارف عزیز

(بھوپال)


        بعض مسائل ومطالبات ہندوستان میں ایسے پیدا کردیئے گئے ہیں جو عقل وسمجھ سے باہر ہیں، ان میں سے ایک مسلم پرسنل لا کا مسئلہ ہے، جس کو تبدیل کرنے کا آئے دن مطالبہ ہوتا ہے، خاص طور پر سنگھ پریوار اور نام نہاد ترقی پسندوں کا یہی نظریہ ہے کہ مسلم مسائل کی جڑ مسلمانوں کا پرسنل لا ہے ، مسلمانوں کی اقتصادی اور معاشرتی پس ماندگی کو بھی عام طور پر ان کے پرسنل لا سے جوڑ کر دیکھا جاتا ہے اور اسی لئے مسلم پرسنل لا کو تبدیل کرکے کامن سول کوڈ نافذ کرنے کا آئے دن مطالبہ ہوتا ہے۔ آر ایس ایس اور اس کی ذیلی تنظیمیں اس طرز فکر کی سب سے بڑی محرک ہیں، جو اس ملک میں ہندو اکثریت کی آمریت چاہتی ہیں اور اس میں انہیں سب سے بڑی رکاوٹ مسلمان اور ان کے شرعی قوانین نظر آتے ہیں۔

    جہانتک مسلم اقلیت کا تعلق ہے، اسے اپنا پرسنل لا یعنی شرعی احکام سے دست برداری منظور نہیں، اسی کو بچانے کے لئے مسلمانوں نے سپریم کورٹ میں شاہ بانو مقدمہ کے فیصلہ پر ۱۹۸۵ء سے ۱۹۸۶ء تک ایک زبردست تحریک چلائی اور جب تک پارلیمنٹ میں شاہ بانو فیصلہ کے مضمرات پر روک لگانے کا قانون پاس نہیں ہوگیا وہ چین سے نہیں بیٹھے، اس کی وجہ ہٹ دھرمی یا ضد نہیں بلکہ ہندوستان میں مسلمانوںکی علاحدہ شناخت کا مسئلہ ہے جس کو وہ نظر انداز نہیں کرسکتے۔مسلم پرسنل لا کے مخالف یہ دلیل بڑے موثر ڈھنگ سے پیش کرتے ہیں کہ اگر مسلمان مسلم پرسنل لا سے دست بردار ہوکر یکساں سول کوڈ کو قبول کرلیں تو اس سے قومی اتحاد میں مدد ملے گی اور قومی استحکام حاصل ہوگا لیکن واقعہ یہ ہے کہ آزادی کے ۶۸ برس گزر چکے ہیں ، اس طویل مدت میں مسلمانوں کی علاحدہ شناخت سے قومی اتحاد کیلئے کبھی کوئی مسئلہ پیدا نہیں ہوا،ہندوستان میں صرف ہندو یا مسلمان ہی نہیں مختلف لسانی، علاقائی اور مذہبی تہذیب اور شناخت کی حامل دوسری اقلیتیں بھی ہیں، جب جب ان کو یہ احساس ہوتا ہے کہ کوئی چیز اوپر سے ان پر مسلط کی جارہی ہے یا ان کی پسندیدہ شے سے محروم کیا جارہا ہے تو ان میں ردعمل ہوتا ہے اور وہ صف آرائی میں مصروف ہوجاتی ہیں، زبان کی بنیاد پر ریاستوں کی تنظیم نو سے قبل ملک میں بڑا خلفشار تھا، کافی خون خرابہ بھی ہوا، اس میں مسلمانوں کا دور دور تک کوئی رول نہ تھا، جولوگ لڑنے مڑنے پر آمادہ تھے، ان کا پرسنل لا بھی مشترک تھا اور تقریباً سبھی ایک مذہب کے ماننے والے تھے، یہ خلفشار لسانی اور علاقائی بنیاد پر ریاستوں کی حد بندی کے بعد رک گیا، پھر بھی اس میں اتنی شدت تھی کہ تامل ناڈو اور آندھرا جیسی ریاستیں قومی جماعتوں کے قبضہ سے نکل گئیں، آسام وپنجاب کے مسئلہ میں ابھار بھی لسانی ، تہذیبی اور علاقائی امنگوں کا نتیجہ تھا اسلئے آج اصل مسئلہ الگ الگ شناختوں کا خاتمہ نہیں بلکہ ان کو تسلیم کرنے اور ضروری تحفظ فراہم کرنے کا ہے، اگر آسامی ، مدراسی اور سکھ اپنی شناخت سے دست بردار ہونے پر تیار نہیں تو مسلمانوں سے یہ توقع کیوں کی جارہی ہے کہ وہ اپنی شناخت سے دست بردار ہوجائیں۔ قومی اتحاد واستحکام کیلئے یہ ضروری ہے کہ جیسا یہ ملک ہے اس کو اسی شکل وصورت میں قبول کیا جائے ، اس کے تنوع اور کثرت میں وحدت کو برقرار رکھا جائے، اس کی تنسیخ وتبدیلی کی جتنی زیادہ کوشش کی جائے گی، اتنی ہی زیادہ دقتیں پیدا ہونگی۔

    سرکاری اعداد وشمار کے مطابق ہندوستان میں ۱۷-۱۸ کروڑ مسلمان آباد ہیں، وہ اپنے نکاح، طلاق، وراثت وغیرہ کے مسائل اسلامی شریعت کے مطابق حل کرنا چاہتے ہیں، یہ بھی ظاہر ہے کہ مذکورہ قوانین کا نفاذ کسی دوسرے فرقہ پر نہیں صرف مسلمانوں پرہوتا ہے تو اس پر کسی کو کیا اعتراض یا کسی دوسرے فرقہ کا کیا نقصان ہے؟ لیکن ملک کی بدقسمتی کے سوا اسے اور کیا سمجھا جائے کہ مسلم پرسنل لا کے نام سے رائج یہ قوانین جو مسلمانوں کے عقیدہ وایمان کا حصہ ہیں دوسروں کی طرح محض رسم ورواج کا مجموعہ نہیں، بعض ترقی پسند وں کے ساتھ ساتھ سنگھ پریوار کی آنکھ کا کانٹا بن گئے ہیں، اسی لئے کوئی بھی موقع ہو وہ مسلم پرسنل لاکو نشانہ بنانے اور اسے تبدیل کرنے کے مطالبہ سے نہیں چوکتے سمجھ میں نہیں آتا کہ دوسروں کے پرسنل لا میں ٹانگ اڑانے سے کونسی ذہنیت کی تسکین ہوتی ہے، مسلمانوں کے دوسرے سلگتے مسائل ہیں، ان پر کوئی توجہ نہیں دیتا، ان کی تعلیم ہو، اقتصادیات ہو یا جان ومال کا تحفظ، قومی زندگی کے مختلف شعبوں میں امتیازی سلوک روا رکھا جارہا ہے۔مسلم پرسنل لامسلمان خواتین پر مردوں کے ظلم وستم ڈھانے کا ذریعہ نہیں جیسا کہ باور کرایا جارہا ہے، اسلام نے مسلم عورت کو اس کے بشری، نسوانی اور عائلی حقوق کا مکمل تحفظ کیا ہے مگر شعوری یا غیر شعوری طو رپر مخالفوں نے اس سچائی کو نظر انداز کردیا ہے۔آج عورت پر مظالم کیا دوسرے سماجوں اور مذہبوں کے ماننے والوں کے ذریعہ نہیں ہوا ہے۔ عورت اپنے اورپرائے سب کے درمیان غیر محفوظ ہے تو اس کی وجہ ان کے مذہبی ضابطے نہیں، وہ اخلاقی کمزوریاں ہیں جو تیزی سے اثر ونفوذ پارہی ہیں لیکن یہ کھلی سچائی عقل کے اندھوں کی سمجھ سے باہر ہے۔

(یو این این)

*************************

 

 

Comments


Login

You are Visitor Number : 545