ہندوستان میں تعصب کا طوفان

اپنی شناخت چھپانے پر مجبور مسلمان

تحریر: غوث سیوانی، نئی دہلی

    ہندوستانی مسلمان تعصب کا شکار ہیں؟ کیا ان کے ساتھ صرف اس لئے بھید بھائو کیا جاتا ہے کہ وہ مسلمان ہیں؟کیا بھارت میں مسلمان ہونا جرم بن چکا ہے؟ کیا مسلمانوں کو سوچی سمجھی سازش کے تحت سرکاری وغیر سرکاری ملازمتوں سے دور رکھا جاتا ہے؟ کیا ان کے بچوں کو اچھے تعلیمی اداروں میں داخلے سے محروم رکھا جاتا ہے؟ کیا انھیں سرکاری اسکیموں میں حصہ داری صرف اس لئے نہیں ملتی ہے کہ وہ مسلمان ہیں ؟کیابھارتی مسلمانوں کی پسماندگی کی ایک بڑی وجہ تعصب ہے؟ اس قسم کے سوال بھارت میں اٹھتے رہے ہیں اور ان کے جواب تلاش کرنے کی کوششیں بھی ہوتی رہی ہیں۔بھارت میں مسلمانوں کے ساتھ تعصب کی خبریں آتی رہی ہیں اور بڑے پیمانے پر اس قسم کے معاملے سامنے آتے رہے ہیں مگر اس کے خلاف کبھی کوئی قدم نہیں اٹھایا گیا۔ فخرالدین علی احمد، اے پی جے عبدالکلام، عظیم ہاشم پریم، ایم ایف حسین،دلیپ کمار اور محمد رفیع جیسے لوگ بھی تعصب سے نہیں بچ پائے۔بالی وڈ کے سپر اسٹارس شاہ رخ، سلمان، عامر تک اس تعصب سے محفوظ نہیں ہیں۔ کھیل کے اسٹارس عرفان پٹھان، یوسف پٹھان، محمد کیف ، اظہرالدین اور ثانیہ مرازاتک کو کسی نہ کسی جگہ پر تعصب کا سامنا کرنا پڑتا ہے۔ شبانہ اعظمی اور جاوید اختر تک کو پاش علاقوں میں مکان ملنا مشکل ہوجاتا ہے ،محض اس وجہ سے کے ان کے نام مسلمان جیسے ہیں۔ بات یہیں تک نہیں ہے اگر کوئی مسلمان یہاں وزیر ،گورنر یا صدر جمہوریہ بن جائے تو بھی ملک کے تئیں اس کی وفاداری مشکوک رہتی ہے۔ ڈاکٹر ذاکر حسین جب ملک کے صدر تھے تو ان کے خلاف افواہیں پھیلائی جاتی تھیں کہ انھوں نے خفیہ ٹرانسمیشن لگا رکھا ہے اور بھارت کی خبریں پاکستان کو دیتے ہیں۔ ابھی پچھلے دنوں کی بات ہے کہ نائب صدر جموریہ حامد انصاری پر الزام لگایا گیا کہ انھوں نے قومی پرچم کو سلامی نہیں دی۔ حالانکہ طریقے کے مطابق وہ خود سلامی لے رہے تھے اور انھیں پرچم کو سلامی نہیں دینی تھی۔ بات یہ ہے کہ جب اونچے عہدوں پر بیٹھے ہوئے مسلمان تعصب کا شکار ہوتے رہتے ہیں تو عام مسلمانوں کی بات ہی کیا ہے؟حالانکہ ایک دوسری سچائی یہ بھی ہے کہ دنیا کا کوئی ملک ایسا نہیں ہے جہاں اقلیتوں کے ساتھ تعصب نہیں برتاجاتاہو۔ مسلمان جس قدر بھارت میں بھید بھائو کا شکار ہوتے ہیں، اس سے زیادہ عرب ملکوں میں غیر مسلموں کو تعصب کا شکار ہونا پڑتا ہے۔ حالانکہ جس طرح بھارت خود کو سیکولر اور مذہبی اعتبار سے غیر جانبدارظاہر کرتا ہے یہ ممالک ایسا نہیں کرتے ہیں۔ بھارت میں مختار عباس نقوی جیسے مسلمان ہی قابل قبول ہوتے ہیں اور وہ بھی اس وقت تک جب تک وہ مسلمانوں کے مخالفین کے تلوے چاٹتے رہیں۔وہ جب تک کہتے رہیں کہ بیف کھانے والے پاکستان جائیں تب ہی تک ان کی وقعت رہتی ہے۔

     یوجی سی کے ایک سروے کے مطابق مسلمانوں کا نام دیکھ کر ہی انھیں انٹرویو کے لئے کال لیٹر نہیں بھیجا جاتا۔ صرف ایک تہائی انٹرویو کے لئے بلائے جاتے ہیں۔ کمیشن کے محقق پروفیسر سکھدیو تھوراٹ کے مطابق مسلمان ہونے کا مطلب ہے کہ انٹرویو کے لئے کال لیٹر کے چانسیز کم ہوجاتے ہیں۔

تعصب سے کون بچ پایا ہے؟

    بھارت میں مسلمانوں کے ساتھ تعصب کے واقعات آئے دن سامنے آتے رہتے ہیں اور اپنے فیلڈ میں اعلیٰ حیثیت رکھنے والے بھی اس تعصب سے نہیں بچ پاتے ہیں۔ اس کی ایک مثال شاہ رخ کا ایک انٹرویو ہے جو انھوں نے ایک معروف میگزین کو دیا تھا۔ بھارتی فلموں کے سپراسٹار شاہ رخ خان نے انٹرویو دیتے ہوئے کہا تھا کہ ہندوستان میں مسلمان ہونے کے باعث انھیں بعض مشکلات کا سامنا کرنا پڑتا ہے۔ شاہ رخ خان نے ’آوٹ لک ٹرننگ پوائنٹس‘ نامی ایک میگزین کو انٹرویو دیتے ہوئے کہا تھا کہ ہندوستان میں مسلمان ہونے کے باعث انھیں بعض مشکلات کا سامنا کرنا پڑتا ہے۔ان کا کہنا تھا کہ امریکہ پر ہونے والے گیارہ ستمبر کے حملوں کے بعد کے ماحول میں بھارت میں مسلمان ہونا ایک بڑا مسئلہ ہوگیا ہے۔انہوں نے کہا میں کبھی کبھی بغیر کسی وجہ کے سیاستدانوں کے نشانے پر ہوتا ہوں۔ مجھ پر کئی بار اس طرح کے بھی الزامات لگائے گئے ہیں کہ اپنے ملک سے زیادہ پڑوسی ملک کے ساتھ ہمدردی رکھتا ہوں۔غور طلب ہے کہ شیو سینا کے سربراہ بال ٹھاکرے نے کہا تھا کہ شاہ رخ خان کو پاکستان چلے جانا چاہیے۔ حالانکہ یہ بات شاہ رخ تک ہی محدود نہیں ہے بلکہ اداکارہ شبانہ اعظمی اور ان کے شوہر گیت گار جاوید اختر نے بھی کہا تھا کہ انھیں مسلمان ہونے کے سبب اچھے علاقے میں رہائش لئے مکان نہیں ملتا۔سلمان خان کو اس لئے کئی بار سیاستدانوں کے نشانے پر آنا پڑا کہ ان کے والد سلیم خان کا تعلق ایک مسلمان گھرانے سے ہے۔ سنجے دت نجی محفلوں میں یہ کہتے ہیں کہ انھیں اس لئے جیل جانا پڑا کہ ان کی ماں مسلمان تھیں۔ٹی وی چینل آئی بی این 7نے ایک اسٹنگ آپریشن کیا تھا جس میں یہ سامنے آیا تھا کہ دہلی اور نوئیڈا میں ہندو مکان مالک مسلمانوں کو کرائے پر مکان نہیں دینا چاہتے ہیں۔یہ تمام مثالیں ثابت کرتی ہیں کہ بھارت میں بڑے پیمانے پر تعصب کام کر رہا ہے۔مسلمان بچوں کو اچھے اسکولون میں داخلہ نہ ملنے کے سبب مسلم محلوں کے اسکولوں میں جانا پڑتا ہے اور نتیجہ کے طور پر وہ مخصوص قسم کے ماحول کے عادی ہوجاتے ہیں اور مقابلہ جاتی امتحانات میں بھی نہیں آپاتے ہیں۔ سرکاری اور غیر سرکاری سبھی سیکتر میں مسلمان تعصب کی وجہ سے نہیں آپاتے ہیں ۔ اگر فلم اور کرکٹ کے میدان میں مسلمان نظر آتے ہیں تو صرف اس لئے کہ یہاں صلاحیت بولتی ہے اور وہ اپنے ٹیلنٹ کی بنیاد پر یہاں جگہ بنانے میں کامیاب ہوجاتے ہیں۔ یہاں امیتابھ اور جیا بچن مل کر اپنے بیٹے کو اسٹار نہیں بنا پاتے ہیں مگر دلی کا ایک غیر فلمی گھرانے کا نوجوان آکر فلم بینوں کے دلوں پر راج کرتا ہے تو صرف اور صرف اپنی قابلیت اور ہنر کی بنیاد پر۔متعصبانہ رویہ ملک اور قوم کے لئے فائدہ مند نہیں ہے ۔

 بھارت کے مسلمان،چھپار ہے ہیں اپنی پہچان

    مسلمان تعصب کے سبب اپنی شناخت چھپانے پر مجبور ہورہے ہیں۔ایک میڈیا رپورٹ کے مطابق ۳۰سالہ عائشہ بیگم کلکتہ کے ایک اسپتال میں صفائی کا کام کرتی ہے مگر اسے یہاں سب لوگ لکشمی کے نام سے جانتے ہیں۔ وہ کلکتہ سے ۵۰ کیلو میٹر دور رہتی ہے اور اسپتال آنے سے پہلے ایک ہندو عورت کا روپ اختیار کرلیتی ہے۔ اس کے ہاتھ میں سنکھ کی چوڑیاں ہوتی ہیں جو بنگالی ہند وعورتوں کی پہچان ہیں اور گلے میں ’’اللہ‘‘ لکھے ہوئے لاکیٹ کی جگہ ایک ہندو دیوی کے نام کا لاکٹ آجاتا ہے۔ اسپتال میں اسے سب لکشمی کے نام سے ہی جانتے ہیں۔ عائشہ عرف لکشمی کا کہنا ہے کہ میں نے نوکری حاصل کرنے کی بہت کوشش کی مگر مجھے کہیں کام نہیں ملا۔ پھر میں نے ایک روز ہندو بن کر کوشش کی اور فوراً اسپتال میں کام مل گیا۔ مجھ سے یہ بھی کہا گیا کہ تم اپنے جیسی اور بھی عورتوں کا کام پر لائو،یہاں ضرورت ہے۔ میں نے کہا کہ کچھ مسلمان عورتیں کام چاہتی ہیں،اگر اجازت ہوتو انھیں لائوں، تب کہا گیا کہ اگر ہندو عورتیں لائو تو اچھا ہوگا۔ اس دن سے آج تک عائشہ مسلمان ہونے کے باجود ہندو کا روپ اختیار کئے ہوئے ہے۔ کلکتہ کی نورجہاں (۴۲)کی کہانی بھی ایسی ہے جو ایک چھونپڑپٹی میں رہتی ہے مگر کام کرتی ہے ایک ہندو فیملی میں۔ وہ بتاتی ہے کہ میں نے اپنے گھر والوں کو بھی نہیں بتایا ہے کہ میں کہاں کام کرتی ہوں اور میرے دوست ورشتہ دار بھی نہیںجانتے ہیں۔ میں جہاں کام کرتی ہوں وہاں مجھے ایک ہندو عورت کے طور پر جانا جاتا ہے اور میں گلے میں منگل سوتر پہنتی ہوں۔ اگر انھیں معلوم ہوگیا کہ میں مسلمان ہوں تو مجھے مارڈالیں گے۔

    راجدھانی دہلی میں بی ایس پی کے ایک ممبرپارلیمنٹ کے گھر پر چند سال قبل ایک خاتون ملازم کو مردہ پایا گیا جس کے بعد پولس نے تفتیش شروع کی تو پتہ چلا کہ وہ ایک مسلمان عورت تھی جو ہندو نام اور روپ کے ساتھ یہاں کام کر رہی تھی۔ یہ تو چند مثالیں ہیں ورنہ بڑی تعداد میں ایسے مسلمان ملتے ہیں جو اپنی پہچان چھپا کر ملازمت حاصل کرتے ہیں۔ انھیں ایسا اس لئے کرنے پو مجبور ہونا پڑتا ہے کہ مسلم پہچان کے ساتھ انھیں ملازمت نہیں مل سکتی ہے۔ کلکتہ میں گھریلو ملازم سپلائی ایجنسی چلانے والے سودھین بوس کا کہنا ہے کہ میری ایجنسی کے ذریعے جن گائوں اور جھگیوں کی خواتین نے گھریلو ملازم کی نوکری پائی ہے ان میں سے نصف مسلمان ہیں مگر ہندو نام اور پہچان کے ساتھ ملازمت کر رہی ہیں کیونکہ مسلمان کو کوئی گھریلو ملازم رکھنے کو تیار نہیں ہے۔

    تعصب کا یہ معاملہ کسی ایک صوبے تک محدود نہیں ہے بلکہ پورے ملک میں چل رہا ہے۔ الہ آباد (یوپی)میں لائن ہوٹل چلانے والے فرحان علی کے ہوٹل پر بہت سے ٹرک ڈرائیور رکتے ہیں اور کھانا کھاتے ہیں مگر ان میں سے کوئی نہیں جانتا کہ وہ مسلمان ہے۔ کیونکہ اس نے اپنی پہچان چھپا رکھی ہے اور ہوٹل میں ہندو دیوی دیوتائوں کے پوسٹر لگا رکھے ہیں۔ اس کا ماننا ہے کہ اگر ٹرک والوں کو معلوم ہوجائے کہ یہ مسلمان کا ہوٹل ہے تو وہ یہاں رکنا اور کھانا پسند نہیں کریں گے۔

    مسلمانوں کے ساتھ تعصب اوربھید بھائو وزیر اعظم نریندر مودی کی آبائی ریاست گجرات میں اس وقت سے بڑھ گیا ہے جب ۲۰۰۲ء میں یہاں فسادات ہوئے تھے اور نریندر مودی وزیر اعلیٰ تھے۔ نفرت انگیزی میں اس وقت مزید اضافہ ہوگیا جب بھگوا تنظیموں نے کھلے عام مسلمانوں کے بائکاٹ کا اعلان کیا اور ریاستی حکومت نے اس پر خاموشی اختیار کرلی۔ اقلیتوں کے حقوق کی لڑائی لڑنے والی سوشل ورکرعائشہ پرویز کا کہنا ہے کہ بھارت میں مسلمانوں کے ساتھ تعصب عام بات ہے اور اسی وجہ سے وہ اپنی پہچان چھپانے پر مجبور ہیں۔ انھیں مسلم پہچان کے ساتھ جاب پانے میں دشواری ہوتی ہے۔

    حالات مجبور کر رہے ہیں کہ مسلمان اپنی شناخت چھپائیں مگر یہ صرف ایک حد تک ہی ممکن ہے۔ جن جگہوں پر بات ڈگریوں اور شناختی کارڈ کی ہو وہاں پہچان چھپانا ممکن نہیں ہے۔ مسلمانوں کے ملازمتوں میں کم ہونے کی ایک بڑی وجہ یہ ہے کہ ان کے مسلمان ہونے کے سبب بیشتر انھیں انٹرویو کے لئے بھی نہیں بلایا جاتا۔

    سماجی ماہرین کا خیال ہے کہ بھارت میں مسلمانوں کے ساتھ تعصب اور بھید بھائو کی تاریخی بنیادیں ہیں۔ یہاں ہزاروں سال سے چھوت چھات کا رواج رہا ہے اور معاشرہ اونچ نیچ میں بنٹا رہا ہے۔ یہاں دلتوں اور پسماندہ برادریوں کے ساتھ بھی بھید بھائو برتا جاتا رہا ہے۔ آج اگر چہ جدید تعلیم اور جدید فکر آرہی ہے مگر یہاں کے لوگ آج بھی پرانی روایتوں سے پوری طرح پیچھا نہیں چھڑا سکے ہیں۔ یہاں مانا جاتا رہا ہے کہ کسی دلت یا مسلمان کے چھو جانے سے چیز ناپاک ہوجاتی ہے۔ دلتوں کو مندر میں آنے یا کنواں سے پانی بھرنے سے اسی سبب روکا جاتا رہا ہے۔ موجودہ سماج کی فکر میں تبدیلی ضرور آئی ہے مگر آج بھی وہ ماضی کی روایات سے پوری طرح پیچھا نہیں چھڑاپایا ہے۔کسی کو مسلمانوں کے کھانے پینے کی عادتوں سے پرہیز ہے تو کسی کو ان کے نماز پڑھنے سے پریشانی ہے۔ غور طلب ہے کہ ۱۹۷۰ کی دہائی میں بجاج کمپنی میں مسلمانوں کو صرف اس لئے نہیں رکھا جاتا تھا کہ نماز کے وقت چھٹی چاہتے تھے۔

             
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔