نعت نبی  ﷺ

عبد اللہ سلمان ریاض

میں ان کی نعت لکھتا ہوں ہدایت بن کے جو آئے
وہی دنیا میں معیارِ شرافت بن کے جو آئے

میں امیدِ شفاعت لے کے ان کے در پہ آیا ہوں
محمد نام ہے جن کا شفاعت بن کے جو آئے

وہ احمد بھی ہیں حامد بھی ہیں یٰسیں بھی ہیں طٰہٰ بھی
اندھیری رات میں شمعِ رسالت بن کے جو آئے

ملائک نے زمیں والوں کو یہ مژدہ سنایا ہے
مبارک ان کی آمد تم کو رحمت بن کے جو آئے

وہ ختم المرسلیں بھی رحمت اللعالمیں بھی ہیں
غریبوں اور کمزوروں کی قوت بن کے جو آئے

سلام ان پر درود ان پر خدا کی رحمتیں ان پر
ہمارے واسطے بابِ اِجابت بن کے جو آئے

ڈبو کر عطر میں خامہ کو سلماںؔ نعت لکھ ان کی
وہ مظہرِ حق اور اسرارِ وحدت بن کے جو آئے

Mob:  9341378921
E-mail: salman_pbh@rediffmail.com