گھر میں چھائی ہوئی سر سبز فضا ہے کہ نہیں
کھڑکیاں بھی ہیں مگر تازہ ہوا ہے کہ نہیں
سوچ پلکوں پہ کئی رنگ ابھر آئے ہیں
کوئی چہرہ وَرَقِ جاں پہ بنا ہے کہ نہیں
شور گلیوں سے مسلسل جو یہاں اٹھتا ہے
مشترک اس میں مری آہ بکا ہے کہ نہیں
آنکھ منظر سے جو ہمزاد مرا غائب ہے
سایۂ جاں بھی ترا تجھ سے جدا ہے کہ نہیں
میں نے امید کی شمعیں تو جلا رکھّی ہیں
میرے ہونٹوں پہ رکھا حرفِ دعا ہے کہ نہیں
جس کی یادوں سے ہے آباد مرے دل کا جہاں
نقش ہے کس کا یہ، کچھ اس کا پتہ ہے کہ نہیں
میرے حصّے میں فقط نام ہی آیا اس کا
تیری دنیا میں بتا کوئی خدا ہے کہ نہیں
وہ تو نقّاد ہیں، تنقید کریں گے عادل
تیری تخلیق میں کچھ حسنِ ادا ہے کہ نہیں
عادل حیات
Department of Urdu
Jamia Millia Islamia
New Delhi 110025
Mobile No.: 9313055400
Emai: adilhayat10@gmail.ocm

***************