Sah loonga tera teer e nazar vaar kiye jaa,
Bas shart yahi hai ki mujhe pyar kiye jaa,

Aa Aa ke basad naaz o ada khana e dil meiN,
Soye huye jazbaat ko bedaar kiye jaa,

Aabaad tujhi se hai yeh kasanaa e hasti,
Hai mujh se mohabbat tuje iqraar kiye jaa,

Achche nahiN lagte haiN mujhe un ke iraade,
Aghyaar agar poocheiN to inkaar kiye jaa,

Is tarz e taghaful ka saba koii to hoga,
Kya mujh se shikayat hai yeh izhaar kiye jaa,

Haalaat musa'id nahiN rahte haiN hamesha,
Hamwaar nahiN raah to hamwaar kiye jaa,

Hai maslahat andeshi ka Barqi yeh taqaza,
Duzdeedaa nigaahi sahi deedaar kiye jaa.