مشکلیں رزمگہہِ زیست کی آساں کردے
اے خدا امتِ مظلوم پہ احساں کردے
 
بارشِ ابرِ کرم در مہِ رمضاں کردے
’’جنسِ نایابِ محبت کو پھر ارزاں کردے‘‘
 
کچھ نہیں قبضۂ قدرت سے ہے تیرے باہر
جو ہیں گمراہ انہیں صاحبِ ایماں کردے
 
اپنی میراثِ گذشتہ ہمیں دے دے یارب
قصرِ طاغوت جہاں ہو اسے ویراں کر دے
 
کھول دے ہم پہ یہ دروازۂ نصرت اپنا
ہم پہ غالب ہیں جو اب ان کو ہراساں کردے
 
بھیج دے پھر سے ابابیلوں کا لشکر یارب
فوجِ باطل کو تو انگشت بدنداں کردے
 
تختۂ مشقِ ستم ہم کو بنانے والے
خاک ہوجائیں، انہیں بے سرو ساماں کردے
 
التجا تجھ سے یہی ہے مری با دیدۂ تَر
فضل سے اپنے یہ پُر تنگیٔ داماں کردے
 
کشتیٔ عمرِ رواں اپنی جو منجدھار میں ہے
ڈوب جائے نہ کہیں، ختم یہ طوفاں کردے
 
ساری دنیا میں ہیں حالات دگرگوں اپنے
اہلِ برما پہ جو اُفتاد ہے آساں کردے
 
روح فرسا یہ مظالم نہیں دیکھے جاتے
آتشِ امن کو برما میں فروزاں کردے
 
روک دے بیخ کنی بھائیوں بہنوں کی مرے
جلد پورا یہ مسلمانوں کا نقصاں کردے
 
خوابِ غفلت میں ہیں جو ان کو جگادے یارب
دشمنِ دیں کو بہم دست و گریباں کردے
 
میر جعفر ہے کہیں اور کہیں ہے صادق
اُن کے چہروں کو جہاں بھی ہیں نمایاں کردے
 
ماہِ رمضاں میں دعا ہے بصد اخلاص مری
مرثیہ خواں ہیں جو اب اُن کو غزلخواں کردے
 
ماہِ رمضاں میں ہمیں عید کا تحفہ دےدے
فضل و احسان و کرم صاحبِ قرآں کردے
 
تیرہ و تار ہے برقی کی شبستانِ حیات
اس کی قسمت کے ستارے کو درخشاں کردے
****************************