* مِل جُل کے ایک ساتھ ہمیشہ رہا کرو *
مِل جُل کے ایک ساتھ ہمیشہ رہا کرو
کوئی اگر بُرا بھی کرے تم بھلا کرو
میزانِ عدل سامنے اپنے رکھا کرو
جو ہے تمہارا فرض بخوبی ادا کرو
تم ہو خدا رسیدہ،یہ بندہ گناہگار
’’اس روسیہ کے باب میں کچھ بھی دعا کرو‘‘
تسخیرِ قلب کے لئے یہ گُر ہے لاجواب
ہو بے وفا بھی کوئی تو اُس سے وفا کرو
حُسنِ سلوک سے نہیں بہتر کوئی عمل
حُسنِ عمل سے کام ہمیشہ لیا کرو
تم کو سنوارنی ہے اگر اپنی عاقبت
بندوں ک حق کبھی بھی غصب مت کیا کرو
کرنا ہے تم کو جو بھی کرو وہ بصد خلوص
برقی ریا سے دور ہمیشہ رہا کرو
*** |