|
* Dil giraftaa hii sahii bazm sajaa lii jaaye, *
Dil giraftaa hii sahii bazm sajaa lii jaaye,
yaad-e-janaa’n se ko’ii shaam na khaalii jaaye,
raftaa raftaa yahii zindaa’n mei’n badal jaate hai’n,
ab kisii shah’r kii bunyaad na daalii jaaye,
mas’haf-e-ruKh hai kisii kaa ke bayaaz-e-Hafiz,
aise chehre se to bas faal nikaalii jaaye,
vo muravvat se milaa hai to jhukaa duun garden,
mere dushman kaa ko’ii vaar na khaalii jaaye,
be-navaa shah’r kaa saayaa hai ke mere dil pe “Faraz”,
kis tarah se merii aashuftaa Khyaalii jaaye.
|
|