naale mire jab tak mire kaam aate raheñge 

ai zauq-e-nazar vo lab-e-bām aate raheñge 
ai zauq-e-talab tū jo salāmat hai to kyā ġham 
lab tak mire ḳhud jaam pe jaam aate raheñge 
dil zinda agar ho to phir ai ziist ke tālib 
har gaam pe jiine ke payām aate raheñge 
manzil kī tamannā hai to Thukrā ke nikal jā 
sayyād liye dāna-o-dām aate raheñge 
khā jaao na dhokā kahīñ manzil ke gumāñ par 
raste meñ kuchh aise bhī maqām aate raheñge 
'aḳhtar' agar ābād rahe gul-kada-e-dil! 
phir is meñ to kuchh mast ḳhirām aate raheñge 

۸۸۸۸۸۸۸۸۸۸۸۸۸۸۸۸