NahiN zameeN pe kisi ka bhi aitabar mujhy,
kaha tha kis ne k aflaak sy utaar mujhy

ba sat'h-e-kuzagar-e-dehr cheekhta hay koi
maiN jaisy haal meiN huN, chaak sy utaar mujhy

bas aik din k liay tu meri jageh aa ja,
bas aik din k liay soNp ikhtiyaar mujhy

tujhy kaha tha k laau dey uthy gi laash meri,
tujhy kaha tha k tu roshni meiN maar mujhy

teri sada k palaTny sy qabl pohNchuN ga,
tu aik bar ba'jazb-e-junooN pukaar mujhy

kabhi to maaN ki terha toot kr mily Akhtar
kabhi to dauR k seeny laga'ay daar mujhy...