jo wehm hay, dar hay, pas-e-parda nahiN nikla,
basti sy abhi tak wo bagoola nahiN nikla...

us qariya-e-Zahraa k liay ghoomi zameeN bhi,
is gaind k naqshy meiN wo khitta nahiN nikla...

hinda ki terha jism udheRa tha hawa ne,
laikin mery seeney say kalaija nahiN nikla...

kuch ham tery mey'aar pe puray nahiN utrey,
kuch tu bhi keh mash'hoor tha jaisa, nahiN nikla...

go shehr meiN pemaish-e-qad aam hay laikin,
ik shakhs bhi ham-qamat-e-sayaa nahiN nikla...

poshaak-e-rafu'kaar k kya kehny k Akhtar,
ik taar gareeban meiN apna nahiN nikla...