غزل

رنگ تازہ گلاب کی مانند 
روپ جنت کے خواب کی مانند

مست ہوجائے دیکھنے والا
تیری آنکھیں شراب کی مانند

یہ بہارِ چمن بھی نہ نکلی
تیرے حسن و شباب کی مانند

لاکھ معنی تری خموشی میں
لب کشائی کتاب کی مانند

بات کرنے سے نغمگی پھوٹے
چال چنگ و رباب کی مانند

یوں ہے وابستہ شرم کا احساس
بے نقابی نقاب کی مانند

میری ہستی کی ظلمتوں کے لئے
تو ہے اک ماہ تاب کی مانند

زندگی پر نہ اس قدر اترا
زندگی ہے حباب کی مانند

خار ہی خار ہیں نہ مل ان سے
روپ جن کا گلاب کی مانند

کل رہے وقت کے سکندر ہم
آج خانہ خراب کی مانند

بات کیا ہے کہ آج کل اپنی 
زندگی ہے عذاب کی مانند

گل رخاں کی نہ بات کر طاہر
گل رخاں ہے سراب کی مانند

علیم طاہر

Mominpura, Survey No.19, H.No.51,
Maligaon, Nasic (M.S)
Mob: 9323177531 , 8976294034
Email: aleemtahir12@gmail.com
بشکریہ: مشتاق دربھنگوی
…………………