GHAZAL
Aye waqt tu guzarne laga kis maqaam se
bazaar hai zamanh mohabbat ke naam se
nazrein miliN to aankhon ne dekhe hazaar khwab
laakhon guman guzre tumhare salam se
jin ki ragoN me khoon hai rishwat ka wo mujhey
aagaah kar rahe haiN halalo haram se
mullah zamana-saz hai pandit hai zar-parast
dono ko kuch gharaz nahin Rehman o Ram se
ab raat ho chuki hai aye aawaragi chaluN
aawaaz de raha hai mujhey koi shaam se
******************