غزل

ایک لڑکی بتانے لگی بھیڑ میں
کون شیطان ہے آدمی بھیڑ میں

بانٹ دی میں نے ساری خوشی بھیڑ میں
اور کُچلے گئے ہم اسی بھیڑ میں

پرزہ پرزہ الگ ہو گیا کیا کروں
گر گئی تھی مری کل گھڑی بھیڑ میں

تجھ کو معلوم کیا اے ہجومِ جہاں
کیسے گذری مری زندگی بھیڑ میں

خیریت بھی کسی نے نہ پوچھی مری
گھِرگیا آج میں اجنبی بھیڑ میں

ہم بھی اشرف اسے گنگنانے لگے
اک غزل مل گئی فکر کی بھیڑ میں

اشرف یعقوبی

6/2/H/1, K.B. 1st Lane
Narkeldanga, Kolkata-700011
Mob: 9903511902 / 9835628519
…………………………