بس اک نظر اِدھر بھی کہ جاں آئے جان میں
ہم بھی تو جانِ من ہیں ترے کشتگان میں

یہ تیرا حسن ہے کہ مرا حسن انتخاب
بس ایک تجھ کو میں نے چنا اِس جہان میں

آگاہ تو ہے دل یہ مگر خود فریب ہے
اس کو تلاشِ امن ہے تیری امان میں

آباد رکھو خانۂ دل اُس کی یاد سے
کہتے ہیں دیو بستے ہیں خالی مکان میں

اُن سے بھلا امیر نظر کیا ملائے گا
خوش رہتے ہیں حلال کی جو خشک نان میں

خوں دے کے بھی چمن میں رہوں گا میں بے وفا
یہ بات تو نہ تھی مرے وہم و گمان میں

رازی تو ہے خموش، مگر وہ خفا ہیں کیوں
کیا پھر کسی نے گھول دیا زہر کان میں؟