zaKHm ko phul kahen nauhe ko naghma samjhen
itne sada bhi nahin hum ki na itna samjhen
dard ka apne mudawa kise manzur nahin
han magar kyun kisi qatil ko masiha samjhen
shobda-bazi kisi ki na chalegi hum par
tanz o dushnam ko kahte ho latifa samjhen
KHud pe ye zulm gawara nahin hoga hum se
hum to sholon se na guzrenge na sita samjhen
chhoDiye pairon mein kya lakDiyan bandhe phirna
apne qad se mera qad shauq se chhoTa samjhen
hum to begane se KHud ko bhi mile hain 'bilqis'
kis tawaqqo pe kisi shaKHs ko apna samjhen
*********************