غزل
از ڈاکٹر جاوید جمیل
حسین خواب کے منظر! مری حیات میں آ
کسی وجود میں ڈھل کر مری حیات میں آ
اب اور ہوتا نہیں انتظار اے محبوب
سنبھال بوریہ بستر، مری حیات میں آ
ہے ایک شکل کہ رہ اپنی ہی حیات میں قید
ہے ایک صورت_ دیگر، مری حیات میں آ
ستم ہی ڈھانا ہے مقصد تو ڈھا قریب آ کر
مرے عزیز ستمگر! مری حیات میں آ
رہا ہے شہر فدا تجھ پہ ایک عرصہ سے
اب اے جمال کے پیکر! مری حیات میں آ
خوشی! تو آئی تو عادت بدل بھی سکتی ہے
ابھی غموں کا ہوں خوگر، مری حیات میں آ
سکوت! رہتا ہے کیوں بحر کی تہوں میں، بتا
کبھی بہ صورت_ گوہر مری حیات میں آ
میں پھر زمانہ میں آب_ حیات بانٹوں گا
یقیں کے پاک سمندر! مری حیات میں آ
مرا نفاق ہی جاوید میرا دشمن ہے
اب اے خلوص کے جوہر! مری حیات میں آ
۸۸۸۸۸۸۸۸۸۸۸۸۸۸۸۸۸۸