غزل
ڈاکٹر جاوید جمیل
 
 
صبح_ تہذیب  روایات  کے  ساتھ  آتی  ہے
شام_ تہذیب  خرافات  کے  ساتھ  آتی  ہے
 
شام_ تنہائی  نہیں  آتی  کبھی  بھی  تنہا
لاکھوں  بدمست  خیالات کے  ساتھ  آتی  ہے
 
میرے ہونٹوں پہ  تبسّم، مری آنکھوں میں چمک
 تیری  ہر  یاد  نشانات  کے  ساتھ  آتی  ہے
 
در پہ رک  جاتی  ہیں خوشیاں جو ترا ساتھ نہ ہو
ہر خوشی صرف ترے  ساتھ کے ساتھ  آتی  ہے
 
چلنے  لگتی  ہے  زبان  ذکر  ترا  چھڑتے  ہی
بات  پر  بات  تری  بات  کے  ساتھ  آتی  ہے
 
کوئی دن آ ئے کبھی  کاش  جوابات  کے ساتھ
ہر  سحر  تازہ  سوالات  کے  ساتھ  آتی  ہے
 
دل  نہ  ہو  جسم میں تو ذہن ہے کیا شے جاوید
 معرفت   شدّت_ جذبات  کے  ساتھ  آتی ہے
******