غزل

نئی فضا میں پرندہ اڑان بھول گیا
زمیں پہ چلنے لگا آسمان بھول گیا

مرے شکار کو ترکش میں تیر لایا مگر
وہ میری جان کا دشمن کمان بھول گیا

اسے تو یاد ہے سارا جہان میرے سوا
میں اسکی یاد میں سارا جہان بھول گیا

وہ شخص زندگی بھر کا تھکا ہوا تھا مگر
جو پائوں قبر میں رکھا تھکان بھول گیا

غریبِ شہر نے رکھی ہے آبرو ورنہ
امیرِ شہر تو اردو زبان بھول گیا

تمام شہر کا نقشہ بنانے والا رضاؔ
جنونِ شوق میں اپنا مکان بھول گیا

ہاشم رضاؔ جلالپوری
Email: hashimrazajalalpuri@gmail.com