غزل

 خوابوں کے  انبار  بہت ہیں تعبیریں کم ہیں
یادوں میں تو نقش بہت ہیں تصویریں کم ہیں
ذہن میں  جانے کیسے کیسے  پلتے ہیں  افکار
پر  کاغذ  پر  لکھنے  والی  تحریریں  کم ہیں
جرم و خطا کی دنیا بھر میں ہے  بہتات  بہت
یوں لگتا ہے  باندھنے  والی زنجیریں  کم ہیں
علم و عمل  کا  باہم  شاید  ٹوٹ گیا  ہے  ربط
بولنے والے لوگ ہیں لیکن  تاثیریں  کم ہیں
دنیا ساری  ان  کی مٹھی  میں  ہے  بند  مگر
حرص و ہوس کے  ماروں کو یہ  جاگیریں کم ہیں
باب خطا  سے  اور  لگاؤ  ہم  پر  کچھ  الزام
جرم  وفا کی ہم  پر  یارو  تعزیریں  کم  ہیں
اس دنیا میں نفرت کیونکر عام ہوئی ہے ابن عظیمؔ
 پیار،  محبت  ،  امن ،  وفا  پر  تقریریں کم ہیں؟    

********************