mera zehn banta chala ja raha hai khayalat-e-fasid ki daldal
ki mahsus hone laga hai
meri zindagi mei.n rahegi hamesha hawas kar-farma
ho sarma ki garma
kabhi pyas bujhti nahi.n hai
piyu.n jitni mai
fusun-e-mulaqat hai bais-e-be-qarari
junun-e-mulaqat rahta hai tari
ki aksar mulaqat hoti hai lekin mulaqat ko ji tarasta hai paiham
kai bar is kaifiyat par hansa huu.n
hai ye kaisi daldal ki jis mei.n phansa huu.n
ubharta huu.n mai.n is ki gahrai se bhi
magar jaise phir Dub jaane ki khatir
ghazab hai hawas ka ye kas-bal
mera zehn banta chala ja raha hai khayalat-e-fasid ki daldal

*****************