Khwab ke kheeme laga kar jaagta hai ek shaqs
Neend ki in waadiyo-n ka raasta hai ek shaqs
Kho si jaati hai-n kahi-n parchhaiyya-n saari meri
Dhoop ki deewar se jab jhankta hai ek shaqs
Ho na jaye wo meri tanhaiyyon se ru ba ru
Meri socho-n mein utar kar sochta hai ek shaqs
Aansuon ke saath behti ek kajal ki lakeer
Kya kahani keh rahi hai jaanta hai ek shaqs
Kya tasawwur saj raha hai band aankho-n mein meri
Aur tou koi nahi-n bas dekhta hai ek shaqs
Apni qismat mein nahi-n paata wo jab ANJUM mujhe
Apne haatho-n ki lakeerei-n kaatta hai ek shaqs