کب تک رہوگے دوش پہ تم سر لئے ہوئے
قاتل کھڑا ہے سامنے خنجر لئے ہوئے

چاروں طرف ہمارے تشدد کی دھوپ ہے
ہم پھر رہے ہیں موم کا پیکر لئے ہوئے

ہم جن کی نذر کے لئے لائے وفا کے پھول
ہم سے ملے وہ ہاتھ میں پتھر لئے ہوئے

مایوس ہوکے لوٹے ہیں اُس کی گلی سے آج
دامن پہ دھول ، پلکوں میں اخگر لئے ہوئے

اک انقلاب اُٹھا جب آیا وہ بزم میں
عرفان و آگہی کا سمندر لئے ہوئے

دیتے ہو تم سدا ہمیں سوغات خار کی
اک روز بھی تو آئو گلِ تر لئے ہوئے

مشتاقؔ معجزہ سے کسی طرح کم نہیں
ہم جی رہے ہیں غم کا سمندر لئے ہوئے
*****************