* انسانیت کے نام کو رسوا نہ کیجئے *
انسانیت کے نام کو رسوا نہ کیجئے
اپنے ضمیر کا کبھی سودا نہ کیجئے
کم ظرف کا نہ لیجئے احسان اپنے سر
مرجایئے مگر کبھی ایسا نہ کیجئے
دامِ فریب و مکر بچھائے ہوئے ہیں لوگ
دنیا میں ہر کسی پہ بھروسہ نہ کیجئے
ہر لمحۂ حیات غنیمت ہے آج کل
برباد اپنا کوئی بھی لمحہ نہ کیجئے
گھر ہی میں رہنے دیجئے جو گھر کی بات ہو
اُس کا پڑوسیوں میں بھی چرچا نہ کیجئے
لگ جائے آپ کو نہ کہیں اپنی ہی نظر
یوں بار بار آئینہ دیکھا نہ کیجئے
جو دسترس سے آپ کی مشتاقؔ دور ہو
ایسی کسی بھی شے کی تمنا نہ کیجئے
***************** |