عزمِ سفر ہمارا یہ کہہ رہا ہے ہم سے
ڈرنا نہیں ہے اب ان راہوں کے پیچ و خم سے

اے مونسِ دل و جاں! اے مرکزِ تمنا
کیوں زندگی ہماری روٹھی ہوئی ہے ہم سے

غم جزوِ زندگی ہے غم حاصلِ خوشی ہے
اشکِ الم کی صہبا چھلکائو چشم نم سے

دل ریزہ ریزہ ہوکر بکھرا رہِ وفا میں
پھر بھی کیا نہ شکوہ اُس بے وفا صنم سے

دنیائے آرزو کے پُرپیچ راستے بھی
لگتے ہیں دیکھنے میں گیسوئے خم بہ خم سے

تک تک کہ راہ تیری اب ڈوبنے لگی ہے
نبضِ مریضِ ہجراں طولِ شبِ الم سے

مشتاقؔ کوئی دیکھے یہ میری سادہ لوحی
دل طالبِ کرم ہے اک پیکرِ ستم سے
****************