Naat e Shareef
Hai Fakhr Rab ne mera muqaddar bana diya
Darbar e Mustafa ka gadagar bana diya
Unki ata o jood o karam hi ka faiz hai
“Qatre ko Mustafa ne samandar bana diya”
Dushman suraagh pane meN nakaam ho gaye
Makdi ne Ghaar e soor peh ek ghar bana diya
Roz e hisaab daawar e mahshar ne bil yaqeeN
Pyaare nabi ko saaqui e kausar bana diya
Mash q e sitam Bilaal thay, sahra ki dhoop thi
Tapti zameeN ko phooloN ka bistar bana diya
ChaaroN taraf jahaaN meN andheroN ka raaj tha
Mere nabi ne noor ka paikar bana diya
Rab ke huzoor rote haiN ummat ke waaste
Rab ko manaya, ham ko qad aawar bana diya
Meri hai kya bisaat ke naat e nabi kahuN
Unka karam ke mujh ko sukhanwar bana diya
Hai unki zaat e paak ke shayaan e shaaN Najeeb
Un ko khuda ne sab se qad aawar bana diya
Najeeb Ahmed Najeeb
۸۸۸۸۸۸۸۸۸۸۸۸۸۸۸۸