* Aaj aawaza e haq kisko sunaee dega *
Aaj aawaza e haq kisko sunaee dega
sach to bus woh hai jo andhoN ko dikhaee dega.
Dour e hazir meiN kahaN kis ki ragoN meiN surkhi
koun hathoN ko tire rang e hinaee dega.
Ghair haiN sab meri mayyat ko uthhane wale
maine socha tha ke kaandha mira bhai dega.
Ab kahaN khoon ke rishtoN ka bharam hai baqi
koun is dour meiN rishtoN ki duhaee dega.
Hai zamane meiN buraee ka chalan kuchh aisa
har bura shakhs har achchhe ko buraee dega.
Teri yadeiN, tiri bateiN, tiri ghazleiN Nasir
baad tere bhi tira zikr sunaee dega.
Nasir Amrohvi. |