go hun wahshi pa tere dar se na Tal jau.nga
han magar dasht-e-adam hi ko nikal jau.nga
tair-e-nama-bar apna yahi kahta hai ki aah
raqam-e-shauq ki garmi se mai.n jal jau.nga
jald ai kash jatawe use joban us ka
phir ho kis kaam ke tum jab ki main Dhal jau.nga
aaj go us ne ba-ruswai nikala mujh ko
gar yahi dil hai to phir aap se kal jau.nga
mashwara kar ke ye dil kucha-e-jaana.n ko chala
azm to lane ka kijo mai.n machal jau.nga
gar yahi aatish-e-ulfat hai to manind-e-sipand
aah mei.n mujmir hasti se uchhal jau.nga
nau-giraftar-e-mohabbat hu.n meri waza se tum
itna ghabrao na pyare mai.n sambhal jau.nga
wae qismat kahe jab sabr sa munis ye baat
tujh pe dekhu.nga bura waqt to Tal jau.nga
jald khuu apni badal warna koi kar ke tilism
aa ke dil apna tere dil se badal jau.nga
ji kahi.n tu na phansa warna tere dam se mai.n
aab-e-ghirbaal ki manind nikal jau.nga
ju.n hina apne wo qadmon se na lagne de.nge
is tamanna mein agar khaak mei.n ral jau.nga
jate jate kaf-e-afsos isi hasrat mei.n
ashk bhar la ke dam-e-naza bhi mal jau.nga
ji.n ke nazdik hai andaz-e-ghazal 'mir' pe khatm
un ko 'jurat' mai.n sunane ye ghazal jau.nga
****************