hum to kahte the dam-e-akhir zara susta na ja

le, chale hum jaan se, mukhtar hai ab ja na ja

le dil-e-betab aata hai wo kar le arz-e-haal

dekhte hi us ki surat is qadar ghabra na ja

tang ho kar kis ada se wasl ki shab ko wo shokh

mujh se kahta tha ki he he is qadar lipTa na ja

pas aana gar nahi.n manzur to aa aa ke shakl

az-rah-e-shokhi mujhe tu dur se dikhla na ja

jau.n jau.n kya kahe hai bas laDai ho chuki

pyar se mere gale ab jaan-e-jaa.n lag ja na ja

kya sama.n rakhta hai wo mahfil se uThna yar ka

aur ishaaro.n se mera kahna ki aa jaana.n na ja

kahte hai.n aata hai wo ai jaa.n bar-lab-amada

tu khuda ke waste Tuk aur bhi rah ja na ja

ruTh kar jab mujh se wo jata hai to kar zabt-e-ah

pahle to kahta hu.n mai.n tu jaa.n ab ja ya na ja

lek uTh kar jab wo jata hai to be-tabi se mai.n

wu.n hi kahta hu.n tire qurban jau.n aa, na ja

loTta hai 'jurat'-e-betab jaane se tere

yu.n use taDpa ke tu ai shokh-e-be-parwa, na ja

******************