* واہی کو اگر اپ کبھی ڈھونڈنا چاہیں *
واہی کا پروگرام
رضا نقوی واہی
واہی کو اگر اپ کبھی ڈھونڈنا چاہیں
وہ پچھلے پہر خواب پریشاں میں ملے گا
اور صبح کو وہ شہر کے سرکاری مطب میں
شیشی لئے انبوہ مریضاں میں ملے گا
اور دن کو وہ سرکار کے دفتر کا اسامی
کھویا ہوا فائل کے بیاباں میں ملے گا
اور ڈیڑھ بجے لنچ کی جب ہوتی ہے فرصت
وہ رہگذر چاٹ فروشاں میں ملے گا
اور شام کو وہ والدِ اطفال گر سنہ
جھولا لئے ملچند کی دکانوں میں ملے گا
اور رات کو دن بھر کا تھکا ماندہ بے چارہ
مردے کی طرح کلبۂ احزاں میں ملے گا
٭٭٭
|