meri iza mei.n KHushi jab aap ki pate hai.n log
to mujhe kis kis tarah se aa ke dhamkate hai.n log
hath kya aata hai un ke kuchh nahi.n malum kyu.n
mujh ko tum se aur tum ko mujh se chhuDwate hai.n log
ek to kuchh ji hi ji mei.n ruk rahe hai.n mujh se wo
dusre ja ja ke un ko aur bhaDkate hai.n log
mere un ke sulh az-bas KHalq ko hai nagawar
wo to hai.n kuchh sard lekin un ko garmate hai.n log
raat aur din soch rahta yahi 'rangin' mujhe
mai.n to sab se rast hu.n kyu.n mujh se bal khate hai.n log

۸۸۸۸۸۸۸۸۸۸۸۸۸۸۸