us ke kuche mei.n bahut rahte hai.n diwane paDe
un mei.n dekha to miya.n-'rangin' na pahchane paDe
mai.n safar mei.n hu.n aur us ko ghair bahkate hai.n wa.n
mujh ko ab kaghaz ke ghoDe ya.n se dauDne paDe
saqiya teri nigah-e-naz ke bais se dekh
jam o KHum aundhe hai.n aur talpaT hai.n paimane paDe
dosto.n ke kahne sunne se mujhe majbur ho
zaKHm-e-dil jarrah ko ai wae dikhlane paDe
ab ghazal ek aur 'rangin' tu badal kar likh radif
qafiya phir ye mukarrar tujh ko kah jaane paDe

۸۸۸۸۸۸۸۸۸۸۸۸۸