وہ خواب زندگی کی سحر کا بھلا لگا
دھوکا ہے خواب پھر بھی یہ دھوکا بھلا لگا

گہنا گیا تھا چاند، ستارے اُداس تھے
اِس تیرگی میں دھوپ کا سایہ بھلا لگا

اِک تیری جستجو ہے کہ گم ہوگئے چراغ
تنہا اُداس راہ پہ چلنا بھلا لگا

اِس شہرِ آرزو میں تو موسم نہیں کوئی
اِس شہرِ دل میں درد کا کانٹا بھلا لگا

جذبے ہی تھے بکھر بھی گئے ہیں تو کیا ہوا
شیشے کی کرچیوں کا بکھرنا بھلا لگا

ہونے لگا ہے غم پہ خوشی کا گمان سا
اندھی شبوں میں صبح کا دھڑکا بھلا لگا
******