وحشتِ دل در و دیوار پہ رقصاں کیوں ہے
میری تنہائی مرے حال پہ خنداں کیوں ہے

تجھ سے چھوٹا ہے نہ چھوٹے گا کبھی رشتۂ درد
وائے دیوانگیِ شوق پشیماں کیوں ہے

تو ہمیشہ سے مکیں ہے مرے ویرانے میں
محفلِ خواب میں اِک رات کا مہماں کیوں ہے

ہر نفس پھول محبت کے کھلائے ہیں مگر
موسمِ گل کا مقدر درِ زنداں کیوں ہے

یوں گزاری ہے شبِ ہجر کہ کچھ یاد نہیں
صبحدم چاک ہوائوں کا گریباں کیوں ہے

میرے آنگن میں اندھیروں کی اُداسی بو کر
اے مرے دوست ترے گھر میں چراغاں کیوں ہے

******