جہان شوق پہ اب انحصار کیا کیجئے
کسی نگاہ کا اب اعتبار کیا کیجئے 

گزرتے وقت کی لے پر جو گنگنا نہ سکیں
اُس ایک گیت کا ذکر و شمار کیا کیجئے 

رہیں جو خاک بسر ہم تمھاری محفل میں
کسی کرم کا عبث انتظار کیا کیجئے 

جو داغ دل میں ہیں دل میں رہیں تو بہتر ہیں
کسی کے سامنے دل آشکار کیا کیجئے 

ہر ایک شاخ کو چھوتی ہے چاہتوں کی نظر
گلہ خزاں کا دلِ بے قرار کیا کیجئے 

سفر میں ساتھ رہے تھے جو ہمدم و دمساز
بچھڑ گئے ہیں سرِ راہ گزار کیا کیجئے 

بڑے خلوص سے کھایا ہے دل پہ زخمِ بہار
اب اتنی بات پہ دامن کو تار کیا کیجئے 

******