Abhi tak raaz-e-fitrat hai agar chaahe ayaa'n ho ja
Kabhi apni zamee'n ho ja kabhi tu aasmaa'n ho ja..!
Bhala kab tak sunaata jaee ga aghyaar ke qisse......
Khud apni daastaa'n likh aur phir khud hi bayaa'n ho ja
Tu hi jaada tu hi manzil tujhe rah-rau se kya matlab..
Kabhi sahra kabhi dariya kabhi sail-e-rawaa'n ho ja..!
Kahaa'n gum ho gaya hai tu zameeno'n aasmaano'n me'n
Khud apne aap ko paa le khud apna raazdaa'n ho ja..!
Jahaa'n jaisi zaroorat ho wahi uftaad hai teri...........
Kabhi shola kabhi shabnam kabhi koh-e-giraa'n ho ja..!
Maqaam-e-bandagi kya hai khudi kya be-khudi kya hai
Kabhi khud aashkaara ho kabhi sirr-e-nihaa'n ho ja.....!
Moqaiyad kaise ho kar rah gaya sehn-e-gulistaa'n me'n
Shamim-e-gul hai tu har su rawaa'n ho ja dawaa'n ho ja