* Ha'nsaane aaya tha lekin rula gaya ek shakhs *
Ha'nsaane aaya tha lekin rula gaya ek shakhs
ajeeb mujh ko tamaasha bana gaya ek shakhs..!
Hawa ke saath hi aaya tha ek chiraagh liye......
hawa thami to achaanak chala gaya ek shakhs...!
Khyaal-o-khaab ki mahfil sajaae baithe the.....
hamaare beech kahaa'n se wo'h aa gaya ek shakhs...!
Ajab ghutan thi lahu jam gaya tha aa'nkho'n me'n
Khuda ka shukr ke aa kar rula gaya ek shakhs....!
Kahi'n se koyi dareecha khula nahi'n rakkha....
mere wajood me'n kaise sama gaya ek shakhs.....!
Chiraagh shaam se pahle jala ke rakkha tha....
na jaane kyo'n ise aa kar bujha gaya ek shakhs....!
Tamaam harf meri daastaa'n se milte the........
'Shamim' kis ka fasaana suna gaya ek shakhs.......! |