* Doobte sooraj ka manzar wo'h suhaani kashtiyaa'n *
Doobte sooraj ka manzar wo'h suhaani kashtiyaa'n
Phir bulaati hai'n kisi ko baadbaani kashtiyaa'n......!
Ek ajab sailaab sa dil ke nihaa'n-khaane me'n tha..
Ret, saahil, door tak paani hi paani, kashtiyaa'n.....!
Mauj-e-dariya ne kaha kya saahilo'n se kya mila.....
Kah gayi'n kal raat sab apni kahaani kashtiyaa'n.....!
Khaamshi se doobne waale hame'n kya de gaye.....
Eik anjaane safar ki kuchh nishaani kashtiyaa'n.......!
Eik din aisa bhi aaya halqa-e-girdaab me'n..............
Kasmasa kar rah gayi'n khaabo'n ki dhaani kashtiyaa'n..!
Aaj bhi ashko'n ke is gahre samundar me'n 'Shamim'
Tairti phirti hai'n yaado'n ki puraani kashtiyaa'n........!
******* |