Sach hai ke apna rukh bhi badalna paRa mujhe
Mai'n qaafile ke saath tha chalna paRa mujhe..!
Be-wajh dil ko thi naye manzar ki justaju.........
Be-naam mausamo'n se bahalna paRa mujhe...!
Kuchh mere kaam aa na saki waz,a-e-ihtiyaat...
Sholo'n se door rah ke bhi jalna paRa mujhe.....!
Is dil pe ikhtiyaar kisi aur hi ka tha.................
Girne ka tha maqaam sa'nbhalna paRa mujhe....!
Dast-e-talab daraaz to sadio'n se hai magar......
Kuchh baat thi ke aaj machalna paRa mujhe......!
Jab mom tha to aa'nch bhi mujh tak na aa saki....
Patthar sa ho gaya to pighalna paRa mujhe.......!
Ek shakhs rah gaya tha so wo'h bhi khafa hua.....
Itni khushi hui ke uchhalna paRa mujhe.............!
Mai'n chaa'nd tha to subh ko ru-posh ho gaya......
Sooraj tha shaam hote hi dhalna paRa mujhe.......!
Kitna baRa hujoom tha mere liye 'Shamim'............
Kis khaamshi ke saath nikalna paRa mujhe...........!
*******