Shaheedo’n ki chitaao’n par lagenge har baras meley,
Watan par marne waalo’n ka yehi baaqi nishaa’n hoga.

Har rutt kayee rangon se banee hoti hai,
Har aankh mei'n heere ki kanee hoti hai,
Patthar bhi uchhaalo toh palat aata hai,
Kya cheez ye hubbul-watani hoti hai. 

Yaqee'n ki dil mei'n hararat rago'n mei'n joshe amal,
Riwayet ab wajd kaa thaa nigahbaan bhii woh,
Thaa darde qaum ka millat kaa thaa khayal use,
Watan ki aan bhii thaa,uska pasbaan bhi woh.

Yaad-e-watan na aae hame’n kyo’n watan se door,
Jati nahi’n boo-e-chaman kya chaman se door.

Hai aaj yeh kya baat ke be-saakhta, 
Hasrat, aati hai rah rah ke azizaan-e-watan ki.

Aghosh-e-mulayam mei’n sulaaya humko,
Khaamosh aawaaz se jagaaya humko,
Kuchch bhi banaae’n tere bigre hue kaam,
Ai khaak-e-watan tu ne banaaya humko

Maara dayaar-e-ghair mei’n mujhko watan se door, 
Rakh li mere Khuda ne meri be kasi ki sharm.

Ahle-e-jauhar ko watan me’in rahne deta gar falak,
Laal kyo’n is rang se aata badakshaa’n chhor kar?

Go bahut kuchh ranj yaaraan-e-watan se tha hame’n,
Aankh mei’n aansoo magar waqt-e-safar aa hi gaya.

Paththar ki moorato’n mei’n samjha hai tu Khuda hai,
Khaak-e-watan ka mujhko har zarra devta hai.

Watan ki fikar kar naadaan, museebat aane waali hai,
Teri barbaadio’n ke mashware hai’n aasmaano’n mei’n.

Azizaan-e-watan ko ghuncha-o-barg-o-samar jaana,
Khuda ho baaghbaa’n, aur qaum ko hum ne shajar jaana.

Sarfaroshi ki tamanna aaj hamaare dil mei’n hai, 
Dekhna hai zor kitna baazoo-e-qaatil mei’n hai.

Saare jahaan se achha Hindustaaa hamaara, 
Hum bul bulei’n hai’n iski, yeh gulsitaa’n hamaara.

Na samjhoge tau mit jaaoge, ai Hindustaa’n waalo,
Tumhaari daastaa’n tak bhi na hogi, daastaano’n mei’n.