پاکستان کے خلاف سیریز میں کامیابی
ٹیم کی اجتماعی کوششوں کا نتیجہ ہے۔ برینڈن میکولم
نیپئر ۔ (یو این این) نیوزی لینڈ کرکٹ ٹیم کے کپتان اور مایہ ناز بلے باز برینڈن میکولم نے کہا ہے کہ پاکستان کے خلاف ون ڈے سیریز میں کامیابی ٹیم کی اجتماعی کوششوں کا نتیجہ ہے، انہوں نے کہا کہ گرین شرٹس کے خلاف سیریز میں کلین سوئپ کے بعد ٹیم کا مورال بلند ہوا ہے جس کا فائدہ ہماری ٹیم کو آئی سی سی ورلڈ کپ کرکٹ ٹورنامنٹ میں ضرور ہوگا۔ اپنے ایک بیان میں انہوں نے کہا کہ ٹیم نے مہمان ٹیم کے خلاف ون ڈے سیریز کے دوران کھیل کے ہر شعبے میں عمدہ کارکردگی کا مظاہرہ کیا اور کامیابی حاصل کی۔ انہوں نے کہا کہ انکی ٹیم کے کھلاڑی اس وقت بھرپور فارم میں ہیں اور وہ انکی کارکردگی قابل ستائش ہے ۔ برینڈن میکولم نے کہا کہ پاکستان ورلڈ کلاس ٹیم ہے اور اس کو میچ میں شکست دینا آسان نہیں تھا تاہم کھلاڑیوں نے میچ کے دوران تمام توجہ کھیل پر مرکوز رکھی اور اپنے عمدہ کھیل کی بدولت کامیابی حاصل کی۔ انہوں نے کہا کہ انکو کھلاڑیوں کی کارکردگی پر فخر ہے اور امید ہے کہ کھلاڑی آنے والے آئی سی سی ورلڈ کپ میں بھی عمدہ کارکردگی کے تسلسل کو برقرار رکھتے ہوئے میگا ایونٹ کا ٹائٹل
اپنے نام کرنے کے لیے بھرپور کوشش کرینگے ۔ برینڈن میکولم نے کہا کہ وہ اس کامیابی پر وہ بہت خوش ہیں جس سے ٹیم کے اعتماد میں اضافہ ہوا ہے۔ انہوں نے کہا کہ انکی ٹیم ورلڈ کپ کے کسی میچ کو آسان نہیں لے گی اور اپنی کارکردگی کے تسلسل کو برقرار رکھتے ہوئے مزید کامیابیاں حاصل کریگی۔
**********************
|