Kabhi mai.n zikr karoo.n din ki shadmani ka,

Fasana khatm to ho shab ki sar girani ka,

Mai.n thak gaya hoo.n magar pao.n chalte jate hai.n ,

Tamam hota nahi silsila rawani ka,

Simat ke aagya qadmo.n me kis tarh sehra,

Suna tha shor bahut uski bekarani ka,

Ajab nahi ke naye raaste nikal aaye.n,

Kisi ne raasta roka hai bahte pani ka,

Mujhe yaqi.n hai meri simt aayega dariya,

Magar jawaz nahi meri khush gumani ka ,

Tamam ahle zaba.n batilo.n ke haq me hai.n ,

Mujhe malal hai kiyo.n apni bezabani ka ,

Khuda samajhta hai khud ko yaha.n jo aata hai ,

Ajiib hal hai Aalam sara-e fani ka .