Idhar dhoondhtee hoon udhar dhoondhtee hoon
Tire pyaar ki raihguzar dhoondhtee hoon
Bahut talKh hai yeh safar zindagee ka
Harik moR per humsafar dhoondhtee hoon
Jo mujh per kabhi aaj tak kee nah tum ne
Wohee ik karam ki nazar dhoondhtee hoon
Abhee shamm-e ummid raushan hai dil meN
keh baad-e shab-e gham saHar dhoondhtee hoon
Satata hai jab shauq-e parwaaz mujh ko
TaRaptee hoon aur baal-o-par dhoondhtee hoon
kanaaroN ke Hasrat tumheN hogee shayad
mujhe doobna hai bhaNwar dhoondhtee hoon
yeh aalam hai ai “Aarzoo” ab junooN ka
keh sehra meN hooN aur ghar dhoondhtee hoon.
"Aarzoo Mehek"