Vo kyaa hai tiraa jis me.n jalva nahii.n hai
Na dekhe tujhe ko.ii andhaa nahii.n hai
Kiyaa hai vahaa.n us ne paimaan-e-fardaa
Yahaa.n hai vo shab jis ko fardaa nahii.n hai
Vo kahte hai.n mai.n zindagaanii huu.n terii
Ye sach hai to un kaa bharosaa nahii.n hai
Mirii ziist kyuu.n kar na ho jaavedaanii
Jo martaa hai us par vo martaa nahii.n hai
Vahii KHaak u.Daanaa vahii gardishe.n hai.n
Ye maanaa ki aashiq baguulaa nahii.n hai
Guluu-giir hai un bhavo.n kaa tasavvur
Garebaan me.n apne kanThaa nahii.n hai
In aa.nkho.n ko jab se basaarat milii hai
Sivaa tere kuchh mai.n ne dekhaa nahii.n hai
Merii hasrate.n is qadar bhar ga.ii hai.n
Ki ab tere kuuche me.n rastaa nahii.n hai
Vo dil kyaa jo dilbar kii suurat na pak.De
Vo majnuu.n nahii.n hai jo lailaa nahii.n hai
Kamaal-e-zuhuur-e-tajallii se jaanaa
Jo pinhaa.n nahii.n hai vo paidaa nahii.n hai
***************