غزل
اپنوں کے پرستار رہے میر بھی ہم بھی
اپنوں سے ہی بیزار رہے میر بھی ہم بھی
ہاں تیرے سبب تیرے سبب تیرے سبب زیست
اک آہِ شرر بار رہے میر بھی ہم بھی
جائے گی تو جائے گی کہاں جنسِ وفا اب
اب تک تو خریدار رہے میر بھی ہم بھی
دل میں تو لگی آگ تغافل سے تھی لیکن
آنکھوں سے گہر بار رہے میر بھی ہم بھی
دیوانے بنے جس کے کبھی میر کبھی ہم
اُس شخص سے ہشیار رہے میر بھی ہم بھی
نوحہ کدۂ دہر میں بیٹھے ہوئے لوگو !
خوشیوں کے عزادار رہے میر بھی ہم بھی
راس آئی انا میر پرستوں کو بھی عاصم
مفلس رہے ، نادار رہے میر بھی ہم بھی
ڈاکٹر) عاصم شہنواز شبلی)
Department of Urdu
Maulana Azad College, Kolkata-700013
Mob: 9831156932
بشکریہ ’’میر بھی ہم بھی‘‘ مرتب: مشتاق دربھنگوی
………………………