Apne Khvaabo.n me.n tujhe jis ne bhii dekhaa hogaa,
aa.Nkh khulte hii tujhe Dhuu.NDhne niklaa hogaa,
zindagii sirf tere naam se mansuub rahe,
jaane kitne hii dimaagho.n ne ye sochaa hogaa,
[mansuub = related]
dost ham us ko hii paighaam-e-karam samjhe.nge,
terii furqat kaa jo jaltaa huaa lamhaa hogaa,
[paighaam-e-karam = message of kindness; furqat = separation]
daaman-e-ziist me.n ab kuchh bhii nahii.n hai baaqii,
maut aa_ii to yaqiinan use dhokaa hogaa,
[daaman-e-ziist = fabric of life; yaqiinan = surely]
raushnii jis se utar aa_ii lahuu me.n mere,
ai masiihaa vo meraa zaKhm-e-tamannaa hoga.