GHAZAL
Jo bichar jaatey hai.n sab se Waqt ki raftaar mei.n
Baith jaatey hai.n wo thak kar saya- e- devaar mei.n
maine khaakastar kiye jhooti ana ke sabz bagh
khud-shanaasi aa gayi jab se mere kirdaar mei.n
ho zulekha sa kisi mei.n aaj jo husne-nazar
ham bhi yusuf ki tarah bik jayengey baazaar mei.n
ajnabiyyat odh kar is shehr me phirtey hai.n sab
aashnaai kho gai hai deda-e-aazaar mei.n
phir badan ki har haqeeqat ho gai hai zere-khaak
kho gaya hai phir se koi rooh ke asraar mei.n
mere matlab ka yaha.n kuch bhi nahi, kuch bhi nahi
main Sukhan chalkar yaha.n tak aa gaya bekaar mei.n
***********