TARHI GHAZAL
Mai.n eik shaakhe-tamanna pe khil gaya hoo.N abhi
Nigaahe-gulcheeN se lekin dara dara hooN abhi
Abhi ye haal k gham kya,,khushi, khushi na lagey
Bahut ajeeb si uljhan mei.n mubtela hooN abhi
Ye soch kar k ye sooraj to dhal hi jana hai
Be-sayebaan se rastey pe chal pada hooN abhi
Na tere ghar ka pata aur na maikada maloom
Main tere shehr me bilkul naya naya hoon abhi
Mere qareeb ke jangal to sarey sookh gaye
Main chashme-tar ki badaulat hara-bhara hooN abhi
yahan pe dil ke dharakney ki bazgasht nahiN
isi liye to sukhan mai.n bhi be-sada hooN abhi
**************